Stimé utenc,
no l'é stat nience un "pìcol lengaz" che à fat n sistem de intuizion del test per fonins tras na aplicazion esterna, se emprevalan de java, da poder desćiarièr. Nos sion i prumes che à pissà de fèr chesta proa e no podon sconer che aon troà sacotanta dificoltèdes. Noscia aplicazion l'à inom scriben.
La é pissèda per fonins con 9 botons e no la serf per i fonins con tastiera QWERTY, olache l'é sù duta la letres.
Etres lengac de mendranza i à abù l met de endrezèr n sistem de la sort T9 per i fonins (i galeisc, i catalegn, i basches, per ejempie), ampò chisc l'é lengac regionèi che i vegn rejoné da sacotanta jent e che i é stac bogn de fèr meter ite sie lengaz ti sistemes operatives interns di fonins, de gra al didament politich e finanzièl di goergn regionèi o nazionèi.
Se pel meter sù l sistem l desćiarian via wap (se coleèr a internet col fonin) a la direzion
www.ladintal.it/wap/
l sistem l va sui fonins Nokia adaté per Java, chest vel dir beleche duc i fonins Nokia belebon neves.
- coi fonins Nokia se pel jir te la rubrica del fonin bel sorì, descheche se fèsc de zenza.
- l sistem l pel jir ence sui fonins Samsung, ampò per jir te la rubrica ge vel durèr l'aplicazion, ajache l fonin no l ge permet a autra aplicazions esternes de jir te la rubrica desche zenza.
- l sistem l pel esser compatibol ence con de etres modìe de fonins, ampò chest no l vegn arsegurà.
- l'aplicazion la é "no sotscrita", descheche se disc, vel dir che dant de manèr l messaje la ge domana na conferma a l'utent e, sun vèlch model, la ge domana la conferma ence per jir te la rubrica. Sun vèlch un model chesta autorisazion per manèr i messajes la per vegnir data una outa per dutes.
- l'é 2 verscions de l'aplicazion, una con ite presciapech 10.000 formes/paroles, una con ite 30.000 formes/paroles. Sun fonins no tant neves, o con pecia capazità de memoria e de calcol, vegn conseà de meter sù chela con manco paroles.
- dant de meter sù na verscion neva de l'aplicazion, vegn conseà de tor demez chela da dant.
- Te chela che l vegn metù sù, l program per solit l vegn logà te la cartela "aplicazions" o "jeghes", aldò del fonin. Vegn conseà de endrezèr na "scurtarela de tastiera" o n coleament su la fenestra prinzipala del fonin per poder se emprevaler del sistem a na vida più sorida, zenza cogner jir a l chierir.